Mahila Diwas Manana Hai To- Mahila Ka Samman Karo

8th March’2013

Pashchim ki tarz par har kisi ke naam ka din manane ka riwaz Hindustan mein bhi prachalit ho chuka hai. Fathers day, Mothers day, Valentines day aur abhi abhi guzra womens day. Hum bhartiye is mamle mein sabse aage hain ki duniya ke kisi bhi kone mein kuch bhi hota hua dekha aur foran shuru ho gaye. Na is baat se matlab ki humari sanskriti, humari sabhyata, humare rahen sahen se uska koi taal mail hai ki nahi. Hume toh bus vahi lakeer peetni hai jo videshon mein peeti ja rahi hai. Matlab aur maksad se kisi ko koi lena dena nahi hai.

Avsoos sirf isi baat ka hai ki din manane mein toh hum kisi se peeche nahi rahena chahate lekin mansikta aur soch mein koi parivartan karna ho, use badalna ho toh hum chitak kar khade ho jate hai. 8th march ko “Vishva Mahila Diwas” , pure vishva mein manaya gaya. Bade bade aayojan hue, alag alag chetron se judi mahilaon ke interview akhbaron mein prakashit hue. TV channels par bhi subha se sham tak Mahila diwas sambhandit khabaron ki dhoom machi rahi. Bade khushnuma se mahaul ka ehsaas hota raha din bhar. Aisa laga jaise ab humara hindustan bhi mahilaon ke prati apni soch ko badalne ko aatur hai.

Lekin bus, din guzra aur kahani khatam. Ab akhbaar uthaiye toh dusre din se hi phir vahi silsila shuru- kya shaher kya gaon ghar se lekar bahar tak, masoom betiyon se lekar vivahit mahilaon ki lutati izzat. Kahi police ke hathon toh kahin apne hi pati ke hathon bat bat par pitati aurat. Daftaron mein apne boss aur seh karmiyon ki fabtiyon aur shoshan ka shikaar aurat. Dahej ke lobhi pariwaron ke hathon jalai jane vali aurat. Aakre gavah hain ki inme se kisi bhi khabar ki sankhya kam hone ka naam nahi le rahi hai. Ye vahi mahilain hain jinke naam par hum har saal Mahila Diwas manane ko tatpar rahete hain.

Valentines day par apni mohobbat ko kya paye kya khareed de, aur zara si takraar ho jai toh muh par acid phekne se lekar sare aam zaleel karne tak ka koi mauka nahi chookte. Ab rahi baat Fathers day aur Mothers day ki pichle dino TV channel par dikhai gai ek khabar ne rongate khade kar diye. Khabar thi ki maha nagron mein rahene vale yuva apne mata pita ko tarah tarah ki takleefe dete hain aur yaha tak ki aksar peetate hain. Ye sab kuch dekhne, sunnne aur padhne ke baad kehne ko kya bacha, ye kaun si taleem hai jo insaan ko haivaan bana rahi hai. Kuch bhi manane se pehle apne girebaan mein ek bar jhaak kar dekhne ki zarurat hai. Ye toh vahi kahavat hui ki ” Hathi ke daat khane ke aur, dikhane ke aur hote hai”. 

jis samay 16 december ki ghatana ke virodh mein pura desh ubal raha tha us samay bhi roz kahin na kahin se vaisi hi darandigi ki khabar aati raheti thi, jo aaj tak usi tarah jari hai. Jimmedariyon ka dosh ek dusre par madhne ka silsila jari hai kabhi police ke sir toh kabhi kanoon vyavstha ke sir. Vikas ke naam par desh ke karandharon dwara bhrashtachar aur ghotalon ke badhti sankhya ne hume pure vishva me sharamsaar hi kiya hai.

Zarurat hai apne aap ko badalne ki, soch ko badalne ki , apne baccho ko paisa kamane ki machine banane ke bajai sanskaarvan banane ki, har rishte ka samman karne ki, pariwar mein ek dusre par bharosa karne ki , desh aur samaj ki ekta aur akhandata ko banaye rakhne ki, jaati aur dharam ke naam par nafrat ki deewar ko gira kar aapasi prem ko badhane ki, neeji swarth se uppar uth kar desh aur samaj ke hith ki baat sochna ki. Jab tak aisa nahi hota kisi bhi din ko manane jaisi baat baimani hi lagti hai.

“Kiski shikayat labh pe lau , Kisko du ilzaam-e-sitam 

Meri tabahi lane vale, Hai jaane pehchane log”.

3 thoughts on “Mahila Diwas Manana Hai To- Mahila Ka Samman Karo

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s